Encargado para presidir unha sala nobre do Seminario Maior de Compostela, este retrato de León XIII, realizado por José María Fenollera a partir dunha fotografía, rende homenaxe ao pontífice que concedeu ao centro a categoría de Universidade Pontificia. Sobre un fondo neutro, o Papa aparece representado de corpo enteiro e en postura sedente, cunha rixidez protocolaria acorde ao carácter oficial da obra. O foco de luz exterior e cenital, recurso característico do pintor valenciano afincado en Compostela, reforza a súa presenza mediante un xogo volumétrico sobre a figura, que, con todo, carece de atributos, símbolos ou emblemas que aludan explicitamente á súa grandeza.