A imaxe representa o apóstolo Santiago como peregrino e como evanxelizador, ao portar o libro na man esquerda e vestir esclavina, sombreiro de ala ancha e báculo coa vieira. Este modelo iconográfico, desenvolvido na contorna da Catedral de Santiago, tivo unha ampla difusión grazas aos obradoiros locais activos no primeiro terzo do século XVII. A escultura procede da igrexa parroquial de San Bieito do Campo, onde probablemente presidía un altar lateral dedicado ao Apóstolo. Tras a remodelación do templo a finais do século XVIII, foi trasladada á Capela Xeral de Ánimas, dependente da mesma parroquia.